電影《絕代三驕》（內地暫名：《父親大人》）噚日喺北京涿州開鏡，主角許冠文、楊千嬅同劉青雲齊齊出現，吸引咗過百內地傳媒到場採訪。楊千嬅話自己細細個就好鍾意許冠文，發夢都估唔到可以同佢一齊做戲，重可以做父女，佢話初時以為許冠文好嚴肅，識落就發覺佢冇架子，合作得好開心。
今次千嬅亦係第一次同青雲合作，佢話同兩位公認嘅好戲之人一齊做戲，真係好大壓力，因為相比之下，自己嘅演技就好唔掂，不過千嬅都好樂觀，佢話今年自己好「老嚟」，買樓又升值，所以希望套戲票房好之餘，最好套戲令佢有得提名，攞番個電影獎就冇得頂。
就連劉青雲咁好戲都話同許冠文拍戲有壓力，因為之前拍《鬼馬狂想曲》扮過許冠文，今次許冠文做佢外父，兩個成日要喺套戲入面針鋒相對，青雲話初時見到許冠文好驚，不過傾落都幾啱嘴形，𠵱家重做咗好朋友㖭。
吳浩康（Deep）、2T嘅蔣雅文（Mandy）同劉思惠（Maggie）噚日出席銅鑼灣捐血站嘅裝修竣工典禮，重身體力行，打算即場捐血救人，可惜等護士檢查過後，只得Maggie可以捐血，Mandy撞啱女性唔方便嗰幾日，所以唔捐得血，阿Deep就話兩個月前曾經暈過，所以亦都唔捐得，咁唯有下次再嚟。
謝霆鋒同阿爸謝賢大前日喺上海接受電視台訪問，重同謝賢一齊喺節目除衫鬥大隻，噚日霆鋒去咗商台做訪問宣傳佢隻新碟，問到有報道話拍《無極》嗰時張栢芝翻𠝹佢，霆鋒用咗一個比喻話畀大家聽同栢芝係情已逝，佢話：「唉！咁千祈唔好影到我阿媽同我阿爸一齊，如果唔係又話謝賢翻𠝹狄波拉。」
吳鎮宇日前喺內地話覺得香港娛樂圈着重唔識做戲嘅偶像演員，卻忽視實力派，畀人覺得佢攞唔到金像獎而單打劉德華，但噚日鎮宇返港，喺機場話呢番言論絕非指任何人，更加唔係話華仔，只係想講整個娛樂圈嘅風氣，估唔到俾內地傳媒誤會，問到怕唔怕華仔嬲，鎮宇就話：「唔怕，佢自己都話過，咁多年有乜未遇過？」
香港新晉女導演黃潔早排拍咗套恐怖片《TheBlackDoor》（暫譯《鬼闇眼》）揚威西班牙，套戲全部英文對白同埋搵外國演員做，畀西班牙嘅Sitges電影節選為推介電影，跟住重喺西班牙南部專為驚慄片而設嘅電影節度攞咗「最佳電影」同「最佳導演」兩個大獎，套戲應該會喺暑假檔期上映。
