大陸黃金周噚日結束，一眾大陸同胞已起程返歸。雖然唔少商舖笑騎騎咁話生意好好，但小初同好多老友就唔多笑得出，因為原本諗得好美好嘅自由行概念股，例如莎莎（178）、周生生（116）同恒豐金（870）等，基本上都冇乜點炒過。
經紀陳安慰大家，話大市跌咗咁多，呢類股份雖然升得唔多，但起碼冇乜點跌過，當大部份國企股跌到眼光光之際，呢批零售股已經算好有交代。
另外，早排無厘頭勁插水嘅福方國際（885），自從公布被可換股債券持有人要求贖回部份債券後，股價即見好轉，並且連升兩日，噚日又升14%，收0.53元，但成交就好乾，只得71萬元。
經紀陳話，唔好以為係公司贖回債券，才令福方股價止跌回升，江湖傳聞福方有街外大戶玩緊衍生工具，由於大戶對撼，才令股價出現波動，事件尚未了斷。
其實單睇公司早排公布全年業績，虧損擴大至5674萬元，小初已經唔敢沾手。
慕容小初