收到風,祖雲達斯打算用四個發霉球員交換馬德里體育會當紮前鋒F拖利斯。正所謂你精佢都精,馬體會奇貨可居,又點會咁笨做呢單買賣?佢哋會長施利素更講明F拖利斯踢完歐洲國家盃一定身價更高,所以已拒絕交易,祖記如意算盤當然打唔響。
撇開馬體會不嬲莫財、認錢唔認人,祖記搵嗰四件交易「籌碼」係甘莫蘭尼斯、杜陀、蒙迪路同埋薩拉耶達,當中只有甘莫蘭尼斯狀況好啲(查實今季都好霉),真係擺上枱都難搵人要。就呢個交易條件,施利素好快就閂晒後門:「我哋至唔會咁笨,佢(F拖利斯)擺明會響今屆國家盃發光發熱,到時身價倍增。」再講,聽聞曼聯同AC米蘭都想爭F拖利斯,正所謂皇帝女唔憂嫁,馬體會唔吊高嚟買至奇。
車路士中場祖高爾對於有人想收購米禾爾,不幾知開心。事關佢早前高位以每股一百便士入咗啲米禾爾嘅股票,但𠵱家隊波咁沉,個價跌到得番廿五個便士,換言之蝕咗近七成半;若然米禾爾被成功收購,可能低位反彈。聽聞祖高爾佢喺車路士嘅周薪成四萬鎊,唔怕坐艇啫。
紐卡素因鬧兵荒,想搵借去樸茨茅夫嘅前鋒路亞返嚟打歐協盃,點知路亞唔制。我求大俠好明白路亞,事關返紐記做後備,留喺老樸就打正選,路亞嘅決定都好正路。不過,聽聞路亞咁做激嬲咗紐記領隊卜比笠臣,希望佢之後嘅前途,唔會因呢件事而受到影響啦!
波圖入咗今屆歐冠盃決賽,本身係葡萄牙人嘅皇馬中場費高,自然開心到震重俾西班牙記者聽到佢喺練習時,猛咁哼「波圖,Ole,Ole,Ole!」費高戥自己友開心,我求大俠好明白,但話晒波圖係踢低西甲球隊拉科魯尼亞入決賽,而費高又喺西班牙搵食,所以都係低調啲好。
馬刺呢排銳不可當,計埋噚日主場贏湖人,已經連勝十七場。可能因為咁,所以佢哋信心爆晒棚;直情喺計分台位置整咗條「倒數」banner,上面計住馬刺嘅衞冕之路剩番十場波。假如佢哋真係一場不失咁封王,重可以破埋湖人○一年季後賽十五勝一負嘅紀錄㖭,到時真巴閉咯!