前日經紀陳提及澳門實德（487）搞配股，點知噚日又有新消息，據聞配新股一事未必搞得成，但有關人等諗緊其他方法搞掂，總之務求唔會對股價有影響。
澳門實德在前日停牌，原本以每股0.63元配售新股，但由於一些技術理由，令到公司無法配售新股，據講同市場反應冇關係。聽聞今次澳門實德配股嘅目的，其實係引入一個對公司有協同作用嘅大隻佬，所以有關人等無論如何都會搞掂呢單交易。
究竟呢件事會點收科？要稍後先知，但小初唔明白，澳門實德早前已經引入賭王四太太為策略性股東，但唔見得對股價同埋成交有太大刺激，唔通今次引入新策略性股東，效果會唔同？
另外，自從上次華人置業（127）大股東配售舊股後，股價一直未好過，但最近股價在4.10至4.20元左右企穩。經紀黃話，上次大股東減持後，傳聞重有古仔跟尾，所以股價先至有支持。
慕容小初