由商台舉辦的「母親的至愛藝人選舉2004」，入選藝人包括汪明荃（阿姐）、Twins、張學友、劉德華和陳慧琳。阿姐昨日親到商台領獎時透露其母下月才返港，故未能一起慶祝母親節，她說：「我通常得閒就打電話問候吓佢，每半年就寄利是畀佢，佢會叫我唔好咁辛苦，記得食嘢。」
阿姐又大讚羅家英是孝順仔，她說：「佢真係好孝順，去到邊都會帶埋佢媽咪，又會同佢去旅行。」有聽眾希望阿姐早日與家英哥拉埋天窗，但阿姐卻稱暫沒有結婚打算，她說：「目前我哋嘅狀況幾好呀，我覺得好舒服，大家好似家人一樣，都算係搵到個伴。」阿姐更表示希望家英哥學跳華爾滋，她說：「因為佢打拍子好準，隻腳又長，着起西裝跳會好靚，不過佢有成見，其實跳華爾滋唔一定要着窄身褲啫。」
採訪、攝影：李珮洳