近排發展商推新盤個心都好雄，尤其係啲特色單位，意向價位愈推愈高，好似完全唔憂賣咁款，無論港九新界樓盤，只要望到海，叫價每呎都去到一萬蚊或以上，佢哋真係信心爆晒燈。
之前有馬灣珀麗灣三期、土瓜灣農圃道18號頂層，然後深井碧堤半島二期，都話特色單位要成萬蚊一呎，噚日華懋馬鞍山迎濤灣，都加入呎價萬元樓行列。
華懋售樓部經理吳崇武話，下個禮拜推出頂層相連單位，兩幢一共六個，由1353至2019方呎，叫價去到一萬蚊一呎，比起最貴嘅分層單位，足足貴一倍。
另一個港島區樓盤，恒基北角御皇臺，複式叫價就要萬五蚊，比起早排薄扶林貝沙灣南灣，呎價破萬嘅水位重要高一啲。
今年焦點樓盤之一，馬灣珀麗灣三期，新地攞到售樓紙後，蓄勢開賣。
雖然負責銷售嘅新地代理執行董事雷霆話，先推出嘅「珀麗二重天」，最快月底至下月賣，不過，噚日市場就收到消息，話有興趣買呢類千三至千四呎「珀麗二重天」單位，可即時入票，每張本票二十萬元。
平時，中小型新盤收本票，普遍五萬至十萬，今次新地收取二十萬做大單位本票，唔通象徵賣價會一樣咁高？
聽講，發展商即時接受準買家出價洽購，好似話至少八千蚊一呎。
長沙灣宇晴軒二期暫時封盤，之前為宣傳而搭建，喺港景峯商場樓下嘅凱旋門模型，都要暫別大家一段時間。發展商特別隆重其事，好似包禮物咁，將個凱旋門封好。呢個五一黃金周期間嘅新旅遊景點，𠵱家變咗個紅色禮物包。
至於凱旋門幾時先至可以重見天日，就要等到宇晴軒二期解封之日。
長實高級營業經理郭子威話，嚟緊會推出兩房單位，示範單位要等下個月先至完成，到時就會再出擊。想同港版凱旋門合照留念，就要等多一個月啦。
好多行業都會向北看，就連物業管理公司都一樣，恒益物業管理就諗到，將屋苑園藝花卉採購一環，嚟一次南水北調，旗下嘅新港城同翠景花園，平台園林嘅花卉，年初開始轉由廣州入口，慳咗四成幾開支。
嚟緊重會將計劃推展去其他物業，例如比華利山、御皇臺、港輝豪庭、得寶花園、花都廣場等十六個屋苑，預算會一口氣到廣州購入五千盆花，為每個屋苑慳番幾萬蚊開支。
銅鑼灣大業主希慎興業，舊年斥資過億，翻新利園二期商場。工程完成，噚日舉行開幕禮。主題BecomeOne，寓意一與二期商場連為一體。兩名充當廣告片中小模特兒現真身，謀殺在場記者唔少菲林。
兩名小模特兒約七、八歲，非常可愛，且擺出各種姿勢，讓各攝影記者拍照。
蘭西
電郵地址：
