特區按摩業總會、舞廳夜總會商會、麻雀館從業員總會「籌委會」、的士高酒吧等組織「籌委會」等，喺一份左報聯合刊登聲明，話支持人大釋法。
本來支持人大釋法，冇乜問題，不過呢班自稱娛樂業人士嘅聯合聲明，呼籲「請即終止一切擾亂正常商業社會的激進行動，馬上還給我們理性的、平靜的市場狀態。」
又係喎。警方經常喺旺角掃黃，將啲舞小姐按摩小姐趕晒上豬籠車，呢輪砵蘭街水靜河飛，按摩及舞廳夜總會嘅正常商業活動，受到擾亂，警方係咪應該反省吓？
廣告有一段，更加無厘頭，佢話：「懇請某些評論家們在報章電台節目，不要把亞洲金融風暴對經濟的負面影響，掠奪為你們的私人財產，藉此製造反對聲音。」
金融風暴嘅「負面影響」，點樣可以俾人「掠奪」，成為「私人財產」？全港嘅負資產業主，佢哋啲樓喺票面上蒸發咗六七成，俾邊個「掠奪」咗？係大班、毓民，定係梁錦松？反而，好多大好青年，走去麻雀館賭博，俾麻雀館抽水，或者遇到老千，啲資產就真係受到掠奪，麻雀館從業員，唔知可唔可以同時反省吓？
重有一段，更加有創意：「我們很難容忍，我們的娛樂廣告穿梭在分化社會的文字家言語中」，嘩，咁即是話嗰啲色情廣告，原來係咁神聖，同啲反釋法嘅評論文章擺埋喺同一張報紙，係影衰咗佢哋㖭。不過，亦有好多家長教師話過：佢哋亦好難容忍香港人嘅青少年子女，穿梭在舞廳按摩院麻雀館嘅光管招牌之中，咁樣會令佢哋嘅道德淪喪。
聯合廣告話：「不須要任何政黨以民主之名義代表我們，我們將在九月把票投給堅持穩定社會的參選人。」原來色情賭博業旺盛，就算好多未成年少女去舞廳兼職，即是社會穩定，咁今年立法會直選議席嘅候選人如余若薇、司徒華呀咁，記住要加一句口號：「反對警方掃黃，支持全港青少年落D消費，同埋全港市民去麻雀館輸多啲」咯喎。
傳真︰2623-9278
電郵︰