雙魚座的方力申，擁有典型的星座性格，感情豐富、愛幻想、適應力強。方力申承認很容易對人有好感，但絕不會做現代版韋小寶，他堅持專一，一定要了解對方才會拍拖。
曾謂少年時因失戀、擔心自己會孤獨的方力申（Alex），新碟內很多歌曲也是他的心聲，所以監製雷頌德替他把唱片名為《NeverWalkAlone》。
其實單憑Alex自我幻想，在感情路上亦不會感到孤單，他說：「我係好易對人有好感，入行前後我已經對五個女仔有好感，對一個女仔耐咗我就會諗得多啲，有時都會諗吓我同嗰個女仔一齊得唔得呢？雙魚座啲人係咁，成日幻想、好浪漫。之後我會愈諗愈多，諗吓適唔適合啦或者其他問題，所以未必一定會拍拖。而且個女仔唔會知，因為只係自己喺個腦諗，唔會有乜行動，如果要我好似韋小寶咁就唔得啦。」
入行日子尚淺的Alex，先後與李彩樺、周麗淇和Twins的鍾欣桐傳緋聞，對於Alex而言，這些都是別人虛構的故事，已作出了回應，把事實告知大家，一切雨過天青。
不煙不酒、絕少夜生活的Alex，生活正常，常留在家中看電視和打機，是這一行少有的「乖仔」。會否有女孩主動追求Alex？他說：「冇喎，不過我接受到女仔做主動，佢哋只係熱情啲啫。而且佢做主動，我都會先了解咗個女仔，要知佢會唔會真係鍾意你㗎嘛。」
採訪：王連連 攝影：仇志德
化妝：Deborah
髮型：VincePang（IIColpo）
場地提供：IIColpo
