自由黨噚晚喺紅磡筵開九十席，與近千位「自由之友」一同慶祝母親節，田少認真大手筆，單係抽獎嘅獎品已經唔嘢少，頭獎係四十二吋三星等離子大電視一部，閒閒哋都要幾皮嘢，二獎係十九吋聲寶LCD電視機，三獎都有部手提電話。
田少唔知係咪想做師奶殺手，出盡渾身解數冧在場女性，佢致辭時話，母親節即係太太節，因為太太唔易做，照顧子女之餘，老公返屋企若黑口黑面，太太都要安慰一番，又要煮埋飯對方食。
有記者即刻問田太，田少返屋企時有冇黑口黑面？田太好識做，話老公「公私分得好開」，絕不黑面，不過就唔多浪漫，連玫瑰花都唔識分，至於老公可能參與直選，佢話就留番畀佢田少自己決定喎。
（圖）自由黨筵開九十席慶祝母親節，田少同太太一齊出席。 韋志滿攝
傳真︰2623-9278
電郵︰