特首噚日去立法會舉行答問大會，不過佢嘅答問大會出名「悶死人冇命賠」，答非所問。
好似朱幼麟問，作為中央同港人溝通橋樑嘅特首，覺唔覺得要為過去幾年雙方缺乏溝通負責，特首第一句就答「我冇打電話畀你，你要小心啦」，在場個個都變咗丈八金剛──摸不着頭腦。原來阿董係指早前朱幼麟玩滑翔傘出意外一事，隔咗咁耐，噚日先補飛問候對方，佢重笑飛天朱，年紀有番咁上下，就唔好再跳降落傘，搞到全堂大笑。
朱幼麟亦唔示弱，回應話自己那次意外是軟着陸，希望香港的政改爭議也可同樣軟着陸。阿董精神唔集中，連「軟着陸」三個字都聽唔清，要問番主席范太，之後又賴係朱幼麟廣東話發音不純正。
朱幼麟講嘢有上海音，羅致光夠晒純正，但講到要求安樂死嘅斌仔，羅致光只係想問政府有咩幫到斌仔生存更有意義，但阿董一再話，要講斌仔就一定要討論安樂死政策，羅致光真係俾阿董激死。
（圖）老董笑飛天朱年紀有番咁上下，唔好再跳降落傘。
傳真︰2623-9278
電郵︰