賓架D請食晚飯，席設蘭桂坊私家廚房，地點雖在鬧市，第一次去就唔容易摸上門，幸好在蘭桂坊路上碰到賓架L，先至唔會去錯隔籬。
呢間係名副其實嘅私房菜——一個廚房、一張大飯枱，只招待賓架D以及佢嘅客仔、老友，夠晒私家，包冇旁人打擾。起初以為賓架D過份講究飲食，但呢輪食過幾間（a）過往有名氣，或（b）近有報章雜誌吹捧，或（c）朋友推薦嘅飯店、老字號，都食到頭擰擰，話過以後唔會再去，所以反而覺得賓架L嘅私家廚房夠晒安全穩陣，起碼物有所值。
食完飯落到蘭桂坊大街（德己立街），時維晚上十時，街上音樂聲響喧天，男男女女，不論國籍，站在街上飲啤酒，好不熱鬧。同行之賓架C歎曰：「余生也早，現垂垂老矣，嚟呢度蒲，都怕冇人吼！」左丁山笑曰：「唓，你風華正茂，大把女仔想媾你之時，你又兩袖清風，冇錢買享受呢？」正是得一唔得二，蘭桂坊係近二十年來興起嘅，九十年代以後先至大旺特旺，賓架C嗰陣重係經理仔，冇資格盡情玩樂。到咗二○○四年咯喎，有心有錢，不過冇力冇時間啫。
賓架D重乖過我哋，對街邊紅粉女無暇一顧，食完飯就打道回府，讀書去也。呢位富家子與別不同，甚有讀書人修養，唔會開口就叫人唔好喺度住。畢竟肯讀胡適、牟宗三著作，唔鋤D、唔包美女嘅男人，係零舍醒啲嘅。