溫碧霞結婚已超過三年，但她因工作而經常頻頻撲撲，被迫與丈夫分開，以致生育計劃一拖再拖。不過，今年她兩夫婦已開始不設防，隨時迎接新生命誕生。
溫碧霞早前去了峇里島拍寫真集，今次的寫真集是為內地的瘦身食品「青春寶」而拍攝。該產品為加強宣傳，落本為代言人溫碧霞到峇里島，拍攝一本在內地免費派發的寫真集，在藍天碧海的優美風景下，她穿上三點式泳衣和吊帶背心等拍照，盡現其苗條身材。
婚後生活美滿的溫碧霞，一直未放棄在娛樂圈發展，故生育計劃便一拖再拖，不過她說：「我同老公都有傾過生BB嘅事，由𠵱家開始，我哋會不設防，希望生BB嘅事可以順其自然。但拍戲同拍劇嘅工作我亦冇打算放棄，只不過我唔想濫拍，希望係有選擇性揀啲好戲嚟拍。之前我同張國忠傾續經理人約，藝能公司已經好了解我想點，原則上我都好滿意藝能幫我喺事業方面嘅鋪排。」
近年來溫碧霞已演出過多齣電視劇，在內地有相當高知名度，故經常有內地娛樂商請她登台或拍廣告，她說：「其實近年嚟我收入來源大部份係來自內地，中國真係一個好大市場，我拍完一個電視劇後，內地又有第二個劇搵你，總之就長拍長有，拍到你唔拍為止。但我始終嫁咗人，冇可能長時間離開香港唔喺老公身邊，所以一年頂多拍一齣。」
