成功上位嘅日本水着女星若槻千夏，呢排同搞笑組合NINETYNINE兩位成員岡村隆史同埋矢部浩之合演咗一個充滿漫畫感嘅廣告，伊人着住婚紗困喺個木桶入面，兩位儍哥就爭住向佢求婚，而觀眾更加成為撮合呢段婚姻嘅關鍵人物！
我大口羅拉成日覺得日本廣告好睇程度比得上日劇，皆因啲廣告意念新奇，拍得過癮，好似明治製菓最近拍咗個新廣告宣傳Pucca、菇之山同筍之里三款朱古力，就搵咗靚女若槻千夏扮演Pucca公主，而岡村隆史就係菇之山嘅村民，而矢部浩之就係筍之里嘅村民，都好有卡通feel。
喺個廣告入面，岡村隆史同矢部浩之都着住套白色禮服，岡村孭住香港景色布景板，而矢部就孭住塞班景色布景板，爭住向若槻千夏求婚。
而觀眾就投票決定若槻最啱同邊個結婚，參加投票又幸運被抽中獎嘅觀眾，重可以免費到若槻同新郎哥度蜜月嘅地方旅遊㖭。咁即係話若槻嫁岡村，fans就會嚟香港帶挈旅遊業啦！
經常以性感水着現身嘅若槻千夏，今次喺廣告度以密實婚紗look出現，令兩位男拍檔眼前一亮，不過，若槻覺得着住婚紗匿喺個大木桶入面拍廣告，重要就住嗰兩位儍大哥喺個木桶上面拔刀，其實都幾辛苦。