前日立法會捐血日，八方一個唔留神，數漏咗黃宏發，又數多咗單仲偕，真係鎖你。原來偕哥等咗好耐都未到佢，而佢又要見人，又要發言，所以趕唔切，只好棄權，而發叔就臨尾先上去，所以冇計佢。
發叔話，佢雖然嗜好杯中物，啲血仍然好純，紅十字會嘅職員都以為佢血壓會偏高，但係check極都冇事。發叔重聲明，佢流嘅梗係香港血，而且係O型，直情係觀世音兼黃大仙，任人抽，因為O型血人人啱用。
八方呢兩日聽呢位從政二十幾年嘅發叔（圖）喺議事堂內有感而言，叫大家「多啲互信同溝通」，好似阿爺阿爸要對個仔多啲容忍，而做仔嘅就要多啲設身處地為佢哋諗吓。
發叔贊成溝通，所以聽到曾慶紅話想同民主派見面好高興，佢叫阿董唔好偏聽，又問阿董過去一個月見咗啲乜嘢人？點知老董當正自己係皇上咁，話唔記得咁多，不如安排個時間畀佢上特首辦傾，發叔覺得好似被打咗入冷宮嘅妃嬪一樣，唔知點應佢。
傳真︰2623-9278
電郵︰