恒指升番59點，中移動（941）升20仙，佔咗恒指升幅12.8點。中移動個勢反覆向上，不妨細細注執啲Call輪短炒。正路對象有兩隻，9979同9824。9979今年11月到期，輪價24.3仙，溢價10%，槓桿率8.8倍。9824今年9月到期，輪價15.2仙，溢價12.3%，槓桿率14倍。
其他大隻電訊股，隻隻都升。中電信（728）爬高1格，收2.40元，配股消息已漸淡化，中電信可以睇番好少少，諗吓Call輪炒炒，對象有9910同9899。9910下月下旬到期，輪價23仙，溢價4.6%，槓桿率10.4倍，時日無多，溢價會逐啲逐啲收縮，炒9910記得執生。9899喺7月到期，輪價57仙，溢價2.1%，槓桿率4.2倍，壽命較長，且溢價又低，揸得嚟令人比較安心，不過爆炸力亦比較弱啲。聯通（762）亦係爬高1格，收5.90元，不過聯通Call輪好難揀得落手。
國企指數升64點，中石油（857）做主角，升7.5仙。國企指數升幅中，中石油佔咗17.4點。隔晚美國油價半支箭咁，創新高，5月期貨收39.57美元，再升59美仙，唔覺唔覺，由上月初低位起計，已經升咗3.67美元，升幅超過10%。
油價升，油股得益，中石油個勢未完，相關Call輪有運行，搵對象短炒，可以揀9901與9343。9901今年8月夠鐘，輪價1元，溢價0.8%，槓桿率3.7倍。9343年底到期，輪價62仙，溢價4.1%，槓桿率5.9倍。
章盛