周杰倫同蔡依林呢一對，雖然成日死口唔認拍拖，只係話大家係好朋友，但佢哋兩個「友好」嘅程度，似乎都冇乜人唔知。早排呢對自稱好朋友嘅小情侶同F4、鄭秀文、陳冠希、郭富城一齊去約旦拍汽水廣告，因為現場有記者喺度猛咁影相，所以佢哋都幾避忌，刻意唔傾偈。不過當佢哋靜雞雞坐埋一角嘅時候，就熱情難耐。
話說周杰倫同蔡依林去到約旦拍廣告，佢哋喺其他歌手面前都扮冇嘢，唔會卿卿我我，而且拍完嘢上巴士時，佢哋兩個又分開上車，之但係又好奇怪，周杰倫隔籬嗰個位，最後一定係蔡依林坐咗！
據馮仁昭所知，佢兩個坐埋一齊，雖然冇乜講嘢，但蔡依林坐喺周杰倫隔籬，竟然情不自禁咁將隻手伸咗去隔籬，摸住周杰倫嘅大髀係咁掃，佢以為自己嘅膊頭冇郁，坐喺附近嘅人就唔會睇到，咁就瞞天過海，點知人哋眉精眼企，成個過程睇到晒，最搞笑重要係俾其他人喺背後當笑話咁講，今次蔡依林都可以話瘀到痹！
羅大佑噚日為演唱會再開記者會，宣布齊豫同潘越雲會做佢個唱嘅嘉賓，又話會喺金曲獎同舒淇一齊行星光大道，問佢對舒淇有乜感覺，羅大佑讚佢非常性感。佢又話會喺陳水扁嘅故鄉台南舉辦演唱會，最初只賣到四成飛，𠵱家就賣剩兩百張，羅大佑話：「銷售成績已經非常好，阿扁沒話說了吧。」
Boy'z嘅Kenny同Steven噚日接受訪問時講到螢幕初吻。Kenny話自己嘅螢幕初吻將會獻畀蔣雅文，佢話遲啲要拍一場擁吻戲，但就好苦惱話唔知向邊個請教。而Steven就話希望可以將螢幕初吻獻畀佢偶像梁詠琪，不過佢就話怕到時唔夠膽錫落去，因為佢覺得對方係只可以遠觀，馮仁昭覺得Steven直頭將梁詠琪當咗係女神！
李泳漢同李永豪呢對孖生兄弟，噚日出席喺將軍澳電視廣播城舉行嘅《五月星辰》，佢哋今個月二十四號就二十四歲，不過生日嗰時兩兄弟就會一齊喺內地拍劇，大孖泳漢就踢爆細佬永豪成日俾女友楊思琦困住，所以到時要帶細佬去蒲，唔知楊思琦聽到後，會唔會跟埋佢哋返內地昅實呢？
劉浩龍噚日喺新城電台接受薛家燕主持嘅節目《家天下》訪問，提起母親節，劉浩龍就話最對阿媽唔好意思嘅係入行七年都出唔到唱片，搞到阿媽每逢過年過節都俾啲親戚追問，而且重要阿媽呢七年嚟都經濟上支持佢，令佢好感動，劉浩龍六月份就會推出個人大碟，佢就當咗呢份係佢送畀阿媽最好嘅母親節禮物。
黃寶瑤噚日出席荃灣一間纖體公司嘅分店開幕酒會，雖然佢現時嘅體重只得一百磅，但為咗應吓景，黃寶瑤都話要收身保持身材健美。佢又話𠵱家忙於喺香港同馬來西亞拍劇，所以經常兩邊飛，不過佢話自己最大興趣都係做主持，因主持要睇即場反應，希望遲啲有機會試試，唔知佢咁講，六叔會唔會畀個機會佢呢？
