推動環保，物業管理公司係重要一環，但點樣喚起業戶環保意識，就唔係咁容易。啟勝管理舊年開始，用回收廢物賣得嘅錢，用嚟購買環保禮品，鼓勵業戶參與環保活動，聽講成效幾好。
啟勝管理董事陳錦輝話，集團喺沙田帝堡城，與業主委員會一齊諗出嘅「環保獎賞計劃」，利用每個月回收廢物，賣到千元做營運基金，購買環保禮品。
住戶若果參與，例如回收活動，提供環保意見，或參與植林計劃等，都可以獲得積分，然後用嚟換取環保禮品，或免費參加興趣班。
𠵱家除咗廢物回收外，業戶減少用水或用電，都可以換到積分。
呢類互動計劃，能有效推動環保，實在值得鼓勵。
電盈贊助國際級著名男高音AndreaBocelli來港演唱，噚日開記招。
不過，下晝記招前，電盈臨時急call，相約傳媒食晏。席上電盈基建主席李智康，只係講飲講食，竟然隻字冇提貝沙灣，蘭西大覺奇怪。
食完晏，蘭西先知，原來Bocelli甫一落機，又喺同一間餐廳隔籬廳晉餐。幾個傳媒朋友係Bocelli嘅fans，即刻過去打招呼，攞簽名，多得電盈巧安排，有機會近距離接觸呢位巨星。之後，電盈及Bocelli就喺餐廳所在嘅酒店開記招。整個過程非常自然，事後蘭西諗番，先至領略，電盈宣傳確有一手。
自從電盈打響貝沙灣豪宅名堂後，賣樓手法有唔少樓盤仿效，好似房協將軍澳怡心園，都推出一萬分積分計劃，住戶可透過積分，使用會所設施，甚至請菲傭。好嘢果然多人學。
玩具城鄭氏兄弟，早前買入三座富豪海灣洋房，終於落實用途，最貴重嗰間D一號屋，決定以近億一標售，間屋五七四三呎，呎價近萬九，可以勁賺千六萬。另一間D型屋，會長揸出租，最平嗰間B型屋，反而自住。
講開呢兩兄弟，之前入嗰批豪宅，已沽得七七八八，山頂道五十六號C屋賺三百萬、舂坎角御濤灣賺千二萬、鴨脷洲深灣軒賺五十八萬，唔計放緊嘅富豪海灣，夾埋賺近千六萬。
聽講，佢哋有意再入貨，近排睇過深水灣香島道三十三號。
蘭西
電郵地址：
