有頭有面商界人物最近每與傳媒人物聚會，總愛問兩個問題，其一係：七一會有幾多人遊行？其二係：九月立法會選舉，民主派會唔會得到三十席或以上？佢哋大概以為傳媒人消息靈通，掌握訊息，估計未來情況比較準確，其實傳媒人與其他人一樣，手上冇水晶球，點會知道未來事。
有人話愛國派四出收風，親近愛國派嘅商界富豪，凡與政協、人大、選委會有關嘅，都要做埋順風耳，故此周街問，向後面人物滙報。如果有人答：七一冇乜人上街，民主派出盡食奶力都只會在立法會選舉中得到二十二席，愛國派唔知會唔會定晒、安靜晒，似食咗定驚寧神丸呢？
與公子W食飯，佢又問以上問題，聽完左丁山嘅標準答案之後，佢就大講循序漸進、均衡參與、普選滋生福利主義嘅道理。左丁山特登講：「均衡參與係啱嘅，北角邨本是平民邨，拆咗之後重新發展，理應均衡參與，私屋與公屋各佔一半；半山區以後有新地盤，亦應建築公屋，等平民基層有機會住上去，享受維港景。」公子W即刻話左丁山黐線，話北角邨與半山區搞均衡參與一定拖低樓價，削弱地盤價值。
騎騎，樓市如此，政治最唔講求均衡參與，外國選舉，最均衡嘅政府就係多黨聯合政府，好似十年八年前嘅泰國及戰後嘅意大利，大凡聯合政府，總理多數任期不長，政局不穩。毛澤東在野之時，就講過組織國共聯合政府（均衡參與也），到共產黨趕走咗蔣介石，邊個再講就係反革命！