韓國野蠻女全智賢，出咗名唔鍾意化妝，去到邊度做宣傳，打扮都好似好求其，唔好話化妝品、性感衫，個頭都好似是但梳吓就算，我羅拉重好記得佢第一次嚟香港時，幾日都係着同一件衫咋！
不過，作為廣告天后嘅全智賢，最近搶咗李奈英半個飯碗，成為化妝品牌Laneige嘅代言人，梗係要交足功課，同佢最大嘅對頭人、另一個化妝品牌Etude嘅宋慧喬，拗一拗手瓜啦。
查實香港人好熟識嘅兩大天后宋慧喬同全智賢，好似都未曾正面交鋒過，今次佢哋喺化妝品新一輯廣告入面，咁啱都係化晒濃妝，大賣好colorful兼搶眼嘅甜心俏佳人造型，我羅拉喺漢城街頭，周圍都見到佢哋兩個閃到七彩嘅海報，即刻覺得透心涼。
全智賢雖然着小背心搽晒厚粉紅唇，出盡佢招牌超模甫士，但冷不防一向着衫好保守嘅宋慧喬，突然嚟個騷胸半露，都一樣煞食，暫時可謂領先一個馬鼻㗎！
不過話又講番轉頭，最近宋慧喬啱啱做咗服裝Litmus嘅代言人，廣告入面佢嘅look雖則話係sell自然感覺，但佢戴大眼鏡嘅娘炳造型，真係唔可以唔講句「判若兩人」囉。