衰到或要踢歐冠外圍賽<br>求驗客手記:皇馬再征亞洲卡住

衰到或要踢歐冠外圍賽
求驗客手記:皇馬再征亞洲卡住

如果皇家馬德里攞唔到今屆西甲聯冠軍,兼且連頭兩名都入唔到,咁就大件事啦!點解?因為佢哋喺呢個夏天唔嚟亞洲𢱑銀兼威威囉。
西班牙《馬卡報》日前話皇馬今夏會重臨亞洲,重會喺香港同東京打兩場表演賽,對手待定;雖然佢哋體育總監華丹奴冇證實,但就話考慮緊去亞洲定美國,定係留番喺歐洲進行季前集訓。
但我求大俠收到風,話皇馬多數唔嚟。事關若皇馬喺聯賽只係攞到第三或第四,就要喺七月尾八月頭打歐冠盃外圍賽,同亞洲之旅撞到正。另外,就算佢哋唔使打歐冠外圍賽,班球員亦要喺六、七月打歐洲國家盃,時間實在太緊促。
重有,華丹奴話留喺歐洲,賺嘅錢同去亞洲或美國差唔遠,既然係咁,又使乜去到老遠備戰呀?

馬甸尼態度軟化重返國家隊有偈傾
意大利國家隊教練查柏東尼游說老將馬甸尼復出國際賽一事,據報後者態度軟化,承認同老查「有得傾」。馬甸尼今季狀態重保持得唔錯,假如肯出山踢今屆歐洲國家盃,當然係意大利之福啦;之但係如果成事,我哋球迷就唔可以喺AC米蘭訪港之行親睹佢風采嘞。

讓基昂攞牌玩嘢下次落場唔好咁趕
阿仙奴為咗令老將基昂可以湊夠上陣場數,從而去攞今屆英超聯冠軍獎牌,喺對上兩場聯賽都喺臨場完前換佢入嚟玩。但係睇番基昂入場時間,差唔多快吹雞,所以我求大俠提醒阿仙奴領隊雲格,喺餘下兩場聯賽佢一定要睇緊啲啲時間,若然搞到基昂衰收尾,咁就唔係幾好啦!

用足總盃做賭注米禾爾煞科戲實搏命
米禾爾領隊韋斯話,佢對球隊最近嘅表現(三和四輸)非常之唔滿意,所以佢決定咗,嚟緊喺禮拜日英甲煞科戰打得好嘅球員,先至有份喺本月尾對曼聯嘅英足總盃決賽上陣。照咁睇,米禾爾班球員為可以喺千禧球場踢決賽,禮拜日主場對巴拉福特一定搏命,不妨信多佢哋一次。

木狼斷上盤纜加尼特攞完獎失威
今年嘅NBA季後賽簡直係上盤嘅天下,尤其有主場之利嘅球隊,幾乎場場都可以大數對手。但喺噚日木狼主場對帝王終於爆冷開下盤,如果波友專捉主場開上盤條路,今次難免損手。不過都唔夠加尼特冇癮,佢啱啱喺賽前攞咗個MVP獎,點知轉頭就俾人剃眼眉喺主場輸波。