韓君婷和姚嘉妮昨日到尖沙嘴，宣傳無綫節目《日日有食神》，二人以性感裝束示範烹調技術，韓君婷一件低胸性感吊帶背心大搶風頭，成為全場焦點。
韓君婷表現得相當風騷，不時應記者要求大擺甫士拍照，她說：「冇法啦，都係為咗個節目啫，我原本着咗件褸，但監製問我會唔會除褸，我同其他女仔都預咗着春裝㗎！」
韓君婷早前到廣東拍攝《日日有食神》，更首次品嘗沙蟲，她說：「啲沙蟲好似蚯蚓咁，我重要生食，不過啲味道都OK，有啲似象拔蚌嘅味，自己食嗰時咪乜都唔諗囉！」
另外，姚嘉妮亦以背心示人，她謙虛地說：「我點着都冇得比啦，自己都有少少自卑㗎，好似上次行婚紗騷咁，其他model好似Rosemary都係坦蕩蕩上陣，但係自己就要墊幾個pad先敢上台，加上自己一瘦又會瘦個胸先，所以冇得比。」
採訪、攝影：駱華齡