民協馮檢基動議，要阿董從頭真諮詢民意，補充佢嗰份好搞笑嘅「九點原則」政制報告，民建聯及自由黨，7.1大遊行之後，一個話跟住阿董，只有辱，沒有榮，一個就發動七七事變，打沉23條，到今時今日，再次施行變性手術，又齊齊梗係瞓身保皇。
譚耀宗以民建聯代表身份，認為香港人唔好再對抗，要接受現實，而自由黨嘅楊孝華，潛咗水好耐，突然一出聲，大罵馮檢基嘅動議係「費時失事，明日黃花」！
講到費時失事、有名無實？邊個有名無實得過呢兩大保皇黨，一個叫民主，一個叫自由，講到真正嘅民主是非，自由訴求，兩個黨雙雙掛羊頭賣狗肉，反而譚楊兩個，自己就冇改錯名，一個就耀「中」，另一個，就鬼咁孝順董建華！
楊孝華反對普選，重話要加強功能團體選舉㖭。講開功能組別，洋名阿哈活．楊嘅「孝公」代表嘅旅遊界，對於佢嘅表現，一早就鬼咬咁不滿。噚日，好多旅行社嘅代表向八方反映，話爭取旅行社業界權益，從來唔見阿哈活咁「敢言」，講到向中方交心表現，今次佢就彈出，唔知係咪覺得席位難保，所以向北京最高阿爺求救？
旅遊界消息人士話：機場稅一百元，本來政府撥出七個巴仙，畀航空公司同旅行社分，但阿哈活係國泰「高層」，啲機場稅七巴仙回佣，由國泰揸手，旅行社叫哈活爭取，佢就話有「利益衝突」，一咪擰歪塊面。重有呢幾年經濟蕭條，好多旅行社冇景，旅行社業界要求過孝公爭取減牌費，或者收少啲，另外，旅行社嘅印花稅，政府收收埋埋，滾存咗三億幾做基金，業界要求哈活，向政府動議，將啲基金撥少少出嚟，協助旅行社自救自強，信都寫咗一百幾十封，哀求到聲淚俱下，但孝公以高官慣有木無表情嘅面口話，各位嘅要求，「可以考慮」，不過考吓慮吓，咁又十二年，一啲事都冇發生過喎。
所以，昨晚啲旅遊從業員睇咗電視新聞，見到楊孝華反民主自由就咁勇，博中方垂青，助佢拉票，同業界爭利益就一味縮，大家都好好笑，覺得若然咁都畀佢成功玩多一屆，就證明孝公真係實在太識食力上位！
孝公話要加強功能組別嘅功能，旅遊界亦好同意，大家話：不如咁，既然孝公做國泰咁耐，同啲旅行社分起錢上嚟，有利益衝突，咁孝公不如動議，旅遊界功能組別一分為二，一個席位，仍然係旅行社，另一個，就專門代表國泰，由陳南祿率領全體空姐投票，畀阿哈活做終身代表，無謂阻住啲旅行社生存。
不過，若然有一席專畀國泰，員工投票又未必選到孝公，因為啲鬼佬機師出名蠱惑兼反中亂港，見到孝公咁反民主，由中情局操縱，整咗個美國佬機師一人出嚟「參選」，好似二○○二年阿董嗰次咁，點算好？
傳真︰2623-9278
電郵︰