大市噚日最熱門嘅話題，除咗估邊幾間公司因配股被證監會調查外，就係兩位老外如何爭奪哈爾濱啤酒（249），真係好耐未見過一隻股票炒得咁熱鬧。
單睇哈啤噚日收市價4.70元，較南非股東全面收購價每股4.30元為高，就知道唔少投資者都估另一名美國股東，會提出另一個全購建議來捍衞控制權。
不過，經紀黃認為家陣先至追入，實在係太冒險，而且就算有得執，斷估水位亦唔慌多。
雖然噚日大市再跌過，但係一樣有人搞配股，就係傳聞多時嘅澳門實德（487）。隻股噚日停牌搞配股，據講以每股0.63元，配售1.5億股新股，集資金額9450萬元，以二三線股嚟講，已經唔算少。
經紀陳話，今次實德配售嘅係全新股，唔可以即刻沽，加上配售價比停牌前收市價0.66元折讓唔多，估計復牌後對股價衝擊有限，應該可以守住配股價，至於炒唔炒得起，就要睇吓新股落在誰人手，但斷估亦唔係一般散戶。
慕容小初