陳豪同陶大宇呢兩個唔同時期嘅師奶殺手，噚日齊齊喺佐敦為無綫新劇《心花放》開工，劇情講佢哋係失散咗嘅兄弟，不過都唔及大宇同吳啟華咁好兄弟，因為大宇真係撐佢老友撐到出晒面㗎！
自從被報道懷疑召妓新聞後，吳啟華對記者態度都幾惡劣，佢早排返咗香港又俾人影到去夜店消遣，身邊又有女伴，但大宇就話：「視乎你用乜嘢角度去睇呢件事，可能佢同個女仔有機會發展呢？佢單身又未結婚，單身有權選擇。」
對於吳啟華早前喺內地被指召妓過夜，大宇重話：「就算過夜都好正常，如果我單身都會。」馮仁昭就覺得大宇咁盲目力撐好友，都幾有問題。
講番陳豪，佢同大宇不斷互送高帽。陳豪話：「大宇教我做戲，我同佢做對手戲好容易入戲，佢份人好nice，我唔介意人哋教我做戲，絕對會接受意見，咁先會進步。」問陳豪覺得邊方面唔及大宇，佢話：「淨係氣度我都模仿唔到。」大宇都讚番陳豪話：「我哋各有各型。」真係聽完都覺得骨痹！
同林熙蕾共遊巴峇島而聲名大噪嘅台灣演員阿丹，日前俾傳媒發現佢同第二個女仔行街街同飲咖啡，之後阿丹話呢個女仔係佢之前喺西門町行街時識嘅，對方係一間時裝店嘅老闆娘，佢重話自己有好多女性朋友。而林熙蕾就話唔介意阿丹約第二個女仔，不過如果阿丹重想繼續追佢，佢嘅答案就係祝佢「GoodLuck」喎，似乎林熙蕾真係唔多高興喎。
無綫𠵱家播緊套劇《翡翠戀曲》，日前播咗一場劉松仁同韓馬利自殺跳樓戲，搞到啲觀眾感到不安，廣管局接咗二十三宗投訴。馮仁昭噚日打畀無綫外事部助理總監曾醒明，佢話無綫呢兩日共接咗四宗投訴，佢話：「我哋都有睇番啲片段，嗰場自殺跳樓係過咗合家歡時段先播，我哋喺播映前都有預告畀觀眾知可能有不安鏡頭，呢啲都係合乎廣播條例要求。」
梁詠琪（GiGi）噚日喺新城做訪問，佢講開有報道話佢推薦官恩娜拍Fancl廣告，就覺得莫名其妙，事關佢唔識官恩娜，只係睇新聞時見過對方個名，而且自己啱啱先同Fancl簽完新合約，亦都拍咗輯新廣告。另外，GiGi又澄清話之前上台灣電視節目時，根本冇講過同男友鄭伊健用紅色床單，佢話好驚fans誤會買嚟送畀佢。
方力申（Alex）稍後要為無綫拍新劇，重要划艇，早排佢成日喺城門河練習，Alex話：「我整到手掌損晒，而且跌過落河三次，好彩冇飲到啲河水。」另外，對於有科大學生喺籃球比賽時打交，Alex話：「讀過書，打交係不智嘅，以前我打波都見過有朋友互相推撞，都要我哋拉番開先冇事。」
