民建聯副主席譚耀宗最近轉新look，唔戴眼鏡（舊look可以參考四面佛配圖），八方重以為佢見到九月立法會選舉，民建聯選情麻麻，嗱嗱聲走去做激光矯視，一改古板嘅小學國文教師形象以吸引親中師奶票。
譚耀宗噚日喺立法會解釋，自己的確有做眼部手術，但唔係為靚，而係因為白內障，花咗兩萬蚊喺寶血醫院做手術換晶體。
阿譚話佢兩隻眼都有白內障，但因為一次過做晒兩邊有啲冒險，所以先做右眼（果然係左仔，連醫眼都肉赤左邊嗰隻先），仍有九百度近視嘅左眼就戴con，手術做咗四十五鐘就搞掂。
另外，黃宜弘丁父憂，所以噚日見佢唔到。佢尊翁黃克立乃全國政協常委及大紫荊勳章得主，本月一日病逝於港安醫院，享年九十五歲。原籍福建嘅黃克立曾在國民政府擔任要職，做過台中市首任市長，一度縱橫國、共兩黨政府，黃克立突然病逝，政界好關心「中指議員」黃宜弘九月循中總出選立法會有冇變數。
（圖）譚耀宗左眼都有白內障，但重未做手術，惟有戴住隱形眼鏡先。
傳真︰2623-9278
電郵︰