呢頭阿爺話○八年立法會直選同功能組別議席比例唔變，繼續五十五十，好多人已經吼住政府可能乘機增加嘅功能組別議席，繼賭王何鴻燊話地產界議席要增加後，香港特區按摩業總會、港九舞廳夜總會商會、持牌遊戲機中心商會、香港麻雀館從業員總會籌委會、香港酒吧的士高從業員總會籌委會同香港聯誼會所從業員總會籌委會正搞緊個「香港娛樂業聯合總工會」，希望爭取娛樂業成為一個功能組別。
佢哋噚日好聰明咁喺某左報登廣告，向國家先施按摩功，話支持人大釋法，九月會將票投畀可以令香港穩定發展嘅參選人。按摩業總會總幹事周鎮宇同八方講，佢哋幾個會代表嘅從業員成二十幾萬人，唔希望香港亂，個個都想多啲人沖涼揼骨揑腳板。𠵱家會鼓勵同業登記做選民，但唔會講明支持邊個政黨。八方問佢，咁7.1遊行算唔算搞亂香港？佢話咁就唔算，但如果唔同政見就起衝突，咁就過份激進。
（圖）夜總會、麻雀館、機舖、聯誼會都齊齊表態效忠。
傳真︰2623-9278
電郵︰