章小蕙當年背着丈夫鍾鎮濤偷戀有婦之夫陳曜旻，這段不倫戀於前年結束後，陳曜旻淪落至家破人亡。日前陳曜旻的女兒陳小韻談到父親近況，痛斥章小蕙破壞別人家庭幸福，迷到父親喪失理智，落得不名一文的下場。
章小蕙（Teresa）當年以鍾鎮濤太太的身份，搭上有婦之夫陳曜旻，消息曾轟動一時。及後陳曜旻太太鍾璧澤（Susanna）病逝，而陳曜旻與章小蕙的七年不倫戀亦終在前年告一段落，男方人財兩空，落得破產收場，結果要轉戰上海經商，重新開始。
陳小韻為陳曜旻與首位妻子朱韻琴所生的女兒，日前在中環接受本報專訪時開腔炮轟Teresa，她說：「Auntie（Susanna）病緊時，爹哋要照顧佢，Teresa喺嗰時加入人哋嘅婚姻，成個家庭被佢破壞咗，已經係害人啦。佢重要繼續講啲意見，每個禮拜都會有啲嘢見報，佢嘅做法完全係我想像範圍之外。Teresa從來冇同我講過嘢，我亦都冇必要同佢傾，因為我只係關心我爹哋嘅感受，嗰時我有同爹哋傾過，但爹哋冇理，所以我都唔多講。
「佢同爹哋拍拖，最初係佢自己攞晒啲相出嚟畀人登，到大家分開，爹哋要走，佢去送機嗰日，又call晒啲記者影相，佢個人係點，我諗大家都知。」
陳小韻又稱父親與章小蕙拍拖後性情大變，當時她也曾為此而感到難過，她說：「由細到大，我屋企得我一個女，爹哋特別錫我、縱我，我哋嘅關係亦好close。直至佢拍拖，佢太focus落去，佢性格變咗好多，變咗第二個人，忽略晒身邊所有嘢。可能嗰時爹哋好寂寞，Teresa𠱁得佢好開心，爹哋」
陳小韻不接受的原因是否因為當時章小蕙仍為鍾太？她即冷笑說：「其實我係一路都接受唔到佢，不過爹哋有自己嘅判斷能力，所以我冇comment。我覺得爹哋係生意人，根本就唔屬於呢個圈，發生咗好多事之後，佢乜都冇晒，冇晒錢，一蚊都冇，身邊嘅人有冇機心？呢樣大家知啦。我爹哋係唔好彩，佢話有好多嘢係整定，但我見到佢突然間老咗好多，破產、身邊嘅嘢冇晒，以前佢好追求生活享受，𠵱家當然唔可以，我睇見咁，個心好唔舒服。
「以前我哋一家人嘅生活好輕鬆，有張爹哋畀嘅信用卡，爹哋可以供應好嘅生活畀我哋，但咁多事之後，我嘅價值觀變咗好多，因為我哋唔可以再有以前嘅生活。至於爹哋𠵱家喺內地嘅生活都OK，佢好積極工作，我都好開心。」
問陳小韻會否很憎章小蕙？她說：「我淨係知道，佢嘅出現累到我屋企有好多事發生，令到成家人冇晒自由，佢每日都畀啲『驚喜』我哋，為我哋帶嚟好多唔方便。好似我媽咪係做生意，嗰時日日都有記者跟住媽咪，搞到佢要喺公司嘅後門走，我會覺得好嬲，𠵱家我會好慶幸佢已經唔屬於我嘅生活入面。」問她對章小蕙有何評價？陳小韻冷笑說：「佢每日講嘅嘢都唔同，好難捉摸，我唔識答，我由頭到尾都冇諗過佢。」
陳曜旻在上海生活兩年，早前有報道指他在當地已另覓新歡，陳小韻說：「呢樣我唔知，爹哋冇同我哋講。」未知她有否勸父親跟章小蕙劃清界線？她說：「爹哋人生經驗比我多，我唔會同佢咁講，但呢個女人真係好有辦法。有次爹哋返香港，佢好輕描淡寫同我講，話今日見過Teresa，覺得佢好冇陰功，一個女人拖住兩個細路……我當時係『吓？點解咁㗎？』我就覺得呢個女人好嘥氣囉！」
此外，陳小韻近日簽約starpromotion公司，正式加入娛圈，她會否擔心將來與章小蕙有碰頭機會？她說：「唔知，我冇諗過。」
採訪：朱倬誼
攝影：陳志嵐
化妝：AndyLeung
髮型：WilsonWong（Chin.G）
場地：JOE'SYAKI
