港股反彈一日，突然又掉頭回落，且幅度唔細，有消息就話係受證監會高調調查配股活動所影響，因為有唔少大行牽涉在內，佢哋有少少窒住道氣。大行無疑係有責任要維持一個公平掌握訊息的市場，而在配售之前先行「探路」，雖係一貫的遊戲規則，但確實係唔公平。不過，配售有「正當」同「不正當」兩種，後者對一眾小投資者嘅利益，造成更大損害，證監在「關注」正當配售之餘，對唔正當嘅活動，更不應放過。
恒指噚日一度大跌238點，好在喺上周五嘅低位水平守得住，收市上番11950，跌147點，期指低水略為收窄到88點。大市在低位走勢反覆，暫時受制10日平均線（12095）阻力，升破後反彈目標指向12700。
海域集團（1220）去年業績理想，近期股價則受大市拖累，一度低跌至2.0元才反彈，噚日收2.35元，跌5仙，但比3月中的高價3.275元，跌幅仍逾28%。
03年（12月年結），海域營業額20.68億元，升45.2%，盈利1.5億元，升36%，每股盈利0.37元，派末期息6.5仙，連同中期，全年共派10仙，往績PE6.35倍，息率4.2厘。
海域係內地五大鋁材廠之一，去年鋁材營業額13.3億元，分類業績1.2億元，分別增長15.1%及25.3%；電鍍化工營業額6.63億元，分部業績6747萬元，分別上升168%及71.7%，集團在開拓高增值及高利潤深加工產品的海外市場，取得理想成績。
海域之策略係唔承擔任何無必要鋁金屬價格風險，因此，去年鋁價上升，以及家下中國為過熱經濟降溫，目標指向上游的電解鋁行業，對海域都無影響，中長線若因銀根收緊而汰弱留強，對集團更為有利。
海域已斥資6億元，在佛山三水興建鋁製品廠房，首階段年底可運作，並正洽購一鋁型材加工廠，目標係要成為三大之一。海域發展速，基金嘅興趣亦愈來愈大。
04年，每股盈利估計0.43元，05年可再上升至0.49元，中線持有，目標價3.5元。
郭兆誠