港股噚日有投機買盤，博美國唔加息兼經濟數據表現理想，偷步入市將港股炒上，恒指收報12098，升147點，成交回升至144億元。國企指數亦借油價上升，抽高石油股而造好，國企指數大升4.5%，收4259。人民銀行未有如傳聞般在五一黃金周宣布加息，但仍有可能在放完長假後，或等到溫家寶返回中國後才公布新招，所以今次國企股反彈，未必持續得好耐。
有線電視宣布奪得英超聯賽事播映權，但消息反而拖累有線寬頻（1097）逆市下跌1.6%至3.025元。有線如果攞唔到英超播映權，自然屬利淡消息，因為唔少客戶係為咗睇波而申請有線，但即使攞到，都唔一定係好事，因為分析員會質疑英超播映權的成本是否偏高，以及球季後的客戶流失情況。
東燃（432）再跌4.8%，收報0.30元。市場主要憂慮電盈（008）稍後再減持，而電盈先前配售出街的2.37億股（10合1）東燃，要到下周初至沽得，真正的沽壓屆時才會出現。雖則話呢批股份，大部份由友好人士接咗，但亦唔排除有人為防做大閘蟹而全力出貨。
中電信（728）傳配股已經傳咗好耐，噚日傳出會落實但縮減配股規模，股價反彈3.3%至2.325元。中電信原定的配售計劃為83.2億股，以噚日收市價計，高達193億元，係非常龐大的抽水計劃。
收市後，突然冇晒下文。老實講，你係芬佬都唔會喺美國議息前做嘢啦。
阿虎