噚日有雜誌報道指陳寶蓮生前嘅經理人陳孝志，日前同曾經同成龍傳緋聞、有「人工美女」稱號的李庭嚟咗香港，陳孝志重做「中間人」，安排李庭喺都會海逸酒店進行不道德交易，重話陳孝志聲稱可安排河利秀同傅天穎（奀妹）做不道德交易。
河利秀前晚同噚日都喺太子拍攝電影《桃色》，陳孝志兩日都去咗探班，被問到佢係「中間人」一事，陳孝志前晚用國語話：「我不是河利秀的經理人，我來探她班，至於李庭最近來香港傾談多部電影，其中一部要露點，她想我過目一下。我知道李庭有一個要好的男友，他又靚仔又有錢。我的樣子亦頗靚仔，要賣不如賣自己。」
至於事件主角李庭噚日就喺電話度話：「亂寫！我怎麼這麼衰？周刊拍到的是我男友。」而陳孝志噚日就好激動咁講：「李庭害了我，那天我跟她在文華酒店碰面，因為她收了三部露點電影的定金，但卻反悔不拍，我代她跟電影商協調。」
奀妹就自覺俾人拖落水，佢噚日喺電話度話：「我真的氣死了，我很倒楣，我連陳孝志的電話都沒有。」
張栢芝最近完成新片《無極》喺橫店嘅戲份，啱啱返咗香港，佢噚日戴住太陽鏡、揸住架平治座駕去咗中環，喺架車入面重有佢女助手同一位女性朋友，因為塞車嘅關係，栢芝架車被迫停咗喺燈位度，呢個時候俾人猛咁影相，亦難怪佢顯得好唔耐煩。
自稱係梅媽契女嘅Christine噚日喺馬鞍山開記者會，除大鬧雜誌記者扮睇樓影梅媽間屋外，就講嚟講去都係話唔甘心被叫「無厘頭契女」，重話會同梅啟明再開記招。不過記者打電話問梅啟明，點知佢反問邊個契女？佢噚日同梅媽去咗中環衡怡大廈，問梅媽知唔知契女開完記招？佢話：「關我乜事？」咁契女有冇徵求佢同意先開記招？梅媽話：「黐線！」
