許冠傑的歌神魅力創造了近十年來的演唱會神話，其下月十場個唱於前日首日賣飛，四十八小時內已火速售罄，主辦單位隨即暫定在八月添食十場，阿Sam昨撰文答謝歌迷支持外，更會在個唱中以五十首金曲會知音。
許冠傑（Sam）於下月五日起將舉行十場演唱會，前日首日公開售票，吸引大批歌迷通宵排隊撲飛，結果竟在短短的四十八小時之內售罄，令阿Sam非常雀躍。為答謝歌迷支持，昨日他親筆撰文表心迹，寫上「多謝支持，願各位繼續微笑，6月紅館見，LoveSamHui」。
阿Sam除觸發fans撲飛熱潮外，不少圈中人如張學友、鄺美雲、林建明及長居大馬的陳秋霞等，也紛紛向主辦單位恒藝亞洲認購門劵，而主辦單位昨日宣布暫定在八月添食十場。
恒藝亞洲的負責人丘亞葵昨日在電話中說：「我諗有超過十年未試過喺咁短時間內賣晒十場演唱會嘅所有飛，可能係呢幾年嚟，經濟嘅重點放咗喺後生度，忽略咗中產消費者。」
阿Sam為以最佳狀態示眾，由上月開始已努力減肥，現已成功減掉三十磅，而近日他又忙於為個唱綵排，由於阿Sam首本名曲太多，他希望在個唱中唱出超過五十首金曲，但未計講對白及其他演出部份，單是唱歌的時間已達兩個半小時，故他也為個唱編排而大感頭痛。
丘亞葵說：「𠵱家淨係計唱歌已經二百一十分鐘，重未計佢同觀眾講嘢同埋許冠文嘅棟篤笑，但阿Sam又唔想太多串燒歌，希望原汁原味，雖然我哋唔介意被罰錢，但個唱唔可以長得太誇張，希望盡量平衡啲。」
