中區商廈買賣市道暢旺，屢見新高成交，租金亦開始逐步上升。蘭西聽市場人士講，大業主加租嘅同時，又縮短免租期，搞到續約租客，即時打退堂鼓，喺同區搵地方搬，結果啲散業主商廈，「冷手執個熱煎堆」，單位突然有客問津同承租，信德中心就係其中一幢受惠商廈。
市場人士話，雖然中區商廈大業主只係加兩三蚊租，但計埋縮短免租期，影響就唔少嘢，租客續約時睇見咁樣，梗係走為上策啦！
不過，由於大業主睇好後市，所以即使加租後，大廈出租情況「𣲷」咗，都一於守落去，費事加完又減，等租客有得憧憬。行內都覺得，今次大業主贏面較高。
電盈薄扶林貝沙灣，身在高科技行業集中嘅數碼港內，但發展商好強調樓盤文化藝術氣息。近排贊助意大利著名男高音AndreaBocelli來港開演唱會，今日重邀請得呢位世界級歌王同電盈賣樓要員出席記招。
呢位男高音來頭強勁，著名男高音巴伐洛提曾稱讚AndreaBocelli歌藝比自己重好。唔少國際級人馬對佢嘅歌藝讚不絕口，例如美國總統布殊、藝人伊利沙伯泰萊同埋巴巴拉史翠珊等。
除此之外，今個月喺大會堂上演嘅聖經故事歌劇《森遜與黛麗拉》，同埋女歌手SarahBrightman今個月底嘅演唱會，貝沙灣都有份贊助。
今年大手投資物業好熱鬧，頭四個月成交總值八十億，最矚目嘅銅鑼灣百利保廣場及九龍城廣場，售予外資基金大摩，共值二十億。
第一太平戴維斯董事總經理李偉文話，其間該公司投資部有四十一億生意，大增四倍半。
縱觀整體，豪宅有淺水灣117號GrosvenorPlace，全幢以九億四售出，酒店有以三億五賣出嘅上環前明珠豪庭酒店……總之，各類物業都有大手買賣。
代理行業四月份佣金收入少咗，但係仍有唔少分行可以做到過百萬數，好似美聯，共有二十間分行佣金過百萬，咪以為都係做豪宅，原來屋苑分行都得，例如馬鞍山中心、美孚三期，甚至東涌分行等。
另外，利嘉閣都有九間分行佣金過百萬，屬於屋苑分行有黃埔二行、荃灣麗城三期同大埔廣場分行。
做屋苑樓生意，唔使羨慕豪宅組同事，其實只要肯努力，一樣可以做到好成績。
地產代理行內已經有多個商會，啱啱又有一個新商會成立，就係地產代理管理協會。
協會會長朱德朗話，宗旨係推廣現代地產代理專業知識，以及技術學習與應用，提高行業服務質素。其次為志趣相同嘅代理提供聚會場所，等大家可以就業內問題交換意見，分享經驗。
另外透過舉辦活動及會議，加強協會與地產代理監管局嘅聯繫。
原來呢個協會係由美聯物業主席黃建業倡議成立，唔怪得委員會大部份係美聯高層。
蘭西
電郵地址：
