搵埋彭妮露玩三人同居
查理絲與男友銀幕調情

南非女星查理絲泰朗（CharlizeTheron）憑住喺《Monster》入面扮醜扮肥演妓女，榮登奧斯卡影后，佢嘅身價同以前梗係完全唔同啦，最近佢接拍《AeonFlux》扮演未來女英雄，已經收成一千萬美元（約七千八百萬港元）。
二十八歲嘅查理絲繼《Monster》之後喺大銀幕嘅最新作品，會係今年年底上映嘅《HeadintheClouds》。呢部片係查理絲舊年未攞影后之前就接拍，當時梗係冇咁多人留意啦，而佢收嘅片酬亦冇咁高。

三十年代故事
不過其實呢部戲嘅陣容都唔差，除咗查理絲之外，重有西班牙女星彭妮露古絲（PenelopeCruz）同查理絲嘅未婚夫史釗活唐辛（StuartTownsend）。
《HeadintheClouds》嘅故事係發生喺三十年代嘅歐洲，住喺巴黎嘅查理絲有兩個同屋主，一個係愛爾蘭籍教師（史釗活飾），另一個就係西班牙難民（彭妮露飾），佢哋三個感情好好，不過查理絲崇尚快樂主義同一心想成為攝影師，相反佢兩個好友就準備加入對抗法西斯主義，命運注定三個人最終要分開。