L教授行將退休，後輩賓架P請教授食飯，H教授與左丁山應邀做陪客。地方就係中環著名廚房占美。左丁山初出道之時，老闆與老闆嘅老闆就以占美為私人廚房，左丁山等一班trainee唔敢行入去，一來荷包唔夠錢，二來自覺冇資格；𠵱家唔同晒咯，人人都入得嚟，只要你肯畀一百五十六蚊食一碟白汁雞皇飯嘅話。呢日就有一班OL聚集，食得唔知幾高興。今時今日，女孩子嘅消費力好強，男仔反而係茶餐廳常客，食午餐肉炒公仔麵。
此日左丁山點咗一個西冷牛扒，食到牙都攰埋，不談也罷，即使係賓架P請客，自己都覺得唔抵，返到公司，下午三點幾就要叫外賣頂肚。食物不佳，好彩有兩位碩學鴻儒在，談笑風生，學咗唔少嘢，賓架P重有大把內幕趣聞，幽默抵死，直情幫助消化。
L教授教書四十年，閱學生無數，好為下一代香港人嘅教育擔心，佢話：「斷層現象好明顯，學生對啲文言文根底極弱，亦都唔識唐詩宋詞，我哋講書講得文雅一啲，佢哋都唔明白。前年朱鎔基退任，退休後仍有不少事情要處理，一張傳統愛國報紙嘅記者竟然話朱總理『樹欲靜而風不息』，嚇死人！最近睇一位學生散文習作，佢話對某教授印象深刻，話別後仍然覺得佢『音容宛在』，我為之啼笑皆非！」賓架P笑到捧肚，建議教授搵一日帶學生去殯儀館考察，當上一課通識教育。