如果你有留意我哋日前嘅報道的話，相信都會知道日本豐田車廠，已為旗下頗受用家歡迎嘅Corolla車系推出Facelifted新版；但原來另一邊廂，廠方亦已為Allex推出新版本，以吸引車迷注意咁話。
與原有嘅Allex相近，Facelifted新車同樣以跑味甚濃嘅造型作賣點，但響改配與Corolla四門房車版相近嘅頭燈組合，襯以全車跑車大包圍、四輪跑車合金胎軨等配備後，從而令車子望落更見一份吸引性；然而，一組尾燈亦經過改良，面積更大之餘重好易睇㖭！車廂配搭方面亦有改動，例如用上經過改良嘅中控台、全新金屬面板或桃木裝飾等等，望落份外突出吸引之餘，加埋闊落車廂空間，乘坐舒適性甚高。
講到機械配搭，新車同樣備有如1.5及1.8公升等引擎俾你揀，當中除有本港最常見嘅1.5公升直4偈（馬力110匹）外，重有頂級版所採用嘅1.8公升VVTL-i偈，馬力輸出高達190匹，性能表現毋庸置疑；未知身處香港嘅車迷，有無機會與之見面。
記者：鄭達基
