國企股噚日強力反彈，確係振奮人心，但經紀陳好貪心，佢話如果連細價股都一齊反彈就更加完美。無他嘅，皆因佢坐咗大量高風險細價股，重未走得甩。
家陣監管咁嚴嘅環境下，就算人哋有心想搞作，都唔係一件易事，例如曾經炒得好瘋狂嘅大凌集團（211），自從前兩年老闆同大陸股東嗌大交後，成系股份都未炒過。不過，最近終於見隻股有動靜，繼宣布在蒲台島搞酒店後，無耐就停牌搞供股，但奇怪係大凌由上個月21日停牌至今，仍然未見復牌，唔知原因為何？
經紀陳話原因好簡單，據講係因為監管機構多嘢問之故。首先，大凌舊時曾經有過話供股又唔供股嘅紀錄，跟住又同大陸股東玩嗌交，然後公司本身又曾經被翻舊帳。總之一句講晒，淨係答問題都要花好多時間。
小初其實想知隻股今次重出江湖，究竟玩唔玩得過？經紀陳就好老實咁講，就算大市真係反彈，睇怕有排先至輪到細價股。
慕容小初