港股冇畀上周五美股下跌拖低，恒指高低波幅98點，全日氣氛都算沉悶。
恒指成份股最出色嘅係德昌（179），收7.20元，升4.3%。不過，就算估中德昌反彈，都唔易喺德昌窩輪身上搵錢。
德昌Call輪有5件，正常輪9154，1仙求沽無人要。鬼咩，重有個幾月壽命，行使價11元，有乜可能正股會忽然升4元。其他4件特種輪，7至9月夠鐘，行使價8.88元至11.50元。正股上唔上得番已經係一個問題，就算升，都好難令到啲輪有剩餘價值。買德昌輪，好易對自己個荷包唔住。
中信泰富（267）平淡中亦算得養眼，收19.50元，進帳40仙。Call輪9572，就咁輕易打入10大龍虎榜，收5.1仙，升幅16%。重有兩個半月命仔，行使價23.50元，望正股呢段時間內升4元，唔多實際，隻輪好大機會最後入於冇渣嗰隻。中信Call輪，9291比較睇得吓，8月到期，輪價17.7仙，溢價5.9%，槓桿率11倍，不過隻輪成交一片空白，睇吓算數，況且正股有冇得繼續去都成疑問。
太古（A，019）、中信都有航空業務，若因航空業今年翻生買藍籌，太A比中信更值得諗，隻太ACall輪9372值得望多兩眼，下月中夠鐘，輪價28.5仙，溢價0.5%，槓桿率18.1倍。想易買賣，可以諗隻鎖定回報輪9176。
章盛