土瓜灣單幢新盤農圃道十八號，大賣精品式豪宅概念，發展商噚日先開放現樓示範單位畀傳媒參觀。
呢個設喺五十樓成三千呎複式五房單位都幾豪華。唔知係咪要襯托物業嘅「貴」氣，成個單位採用國際名牌Gucci家居用品系列做主線，好似房間同樓梯間牆身，都用上非常顯眼，印有G字標誌嘅牆紙，主人房重鋪上G字黑白色地氈，衣帽間就放置嗰間公司嘅手袋，差啲以為去咗專門店。
咪以為淨係得個睇字，發展商話，買特色單位，可得價值十萬Gucci家具用品系列。
除咗用名牌做賣點，呢個複式單位，裏面部份房間，設有轉角大窗，享有二百七十度廣闊景觀，可遠眺九龍灣至鯉魚門及中區海景，上層重有個七百幾呎平台花園。
新地高級銷售經理周美珊話，今次呢個主題示範單位，裝修費用咗成四百萬，幾時開放畀公眾人士參觀，遲啲會公布。呢類特色單位，呎價逾萬。
地鐵上個禮拜六喺九龍灣德福廣場，及青衣城商場搞優惠，鼓勵為人子女者，提早買嘢畀媽咪過母親節，送出總值六十萬現金券，一日之內全部派清，商場營業額至少增加六百萬。兩商場人流增近一成。
喺呢兩個場消費滿八百蚊，可獲百元現金券。聽地鐵總商場市務經理陳嘉明講，其中一個內地團，有對夫婦換咗現金券之後再掃貨，埋單使咗成萬蚊。
生意最好係美容化妝品店，唔少客一買過萬，女士們為咗扮靚零舍豪爽。好似謝太與劉太，就喺德福買咗近兩千蚊護膚品。
今次中港消費者都有優惠，但計落都係港客豪啲，可見香港人都幾孝順。
政府有意年中放寬租務管制，對於好多買樓收租人士，自然係喜訊。
業內人士話，𠵱家業主收樓，真係好艱難，若租客欠租，業主告上法庭，只要租客交番少少錢，業主就唔可以用欠租為理由告租客。只能再申請，改控繳交租金不足，要求收樓，但又要搞過手續。
佢話，當中苦況，真係不足為外人道。
至於代理，就密切留意呢方面嘅商機。
樓市炒風再現，各類物業都有炒家掃貨，其中譚姓投資者，今年賣出多項工廈，賺逾二千五萬。
美聯鄒永堅透露，該名投資者十年來主要投資豪宅、舖位，去年底開始轉買工廈。
新近賣出油塘高輝道寶城工業大廈五樓，購入價二百八萬，上月底以五百三十八萬轉手，獲利近倍。
另外九龍灣宏泰道榮發工業大廈地下三室，二月以三百八十五萬購入，兩個月後以六百三十三萬售出，賺逾六成四。
豪宅當旺，市場缺貨，唔少準買家都覬覦建萊嗰批招標銀主盤，啱啱上個禮拜三截標，以大潭陽明山莊為主嗰批，據聞好多代理都幫客入標。
聽講個別單位噚日開標，中標代理雖然好開心，但係由於未簽單，唔肯透露價錢。負責嘅仲量聯行就話，未收到業主指示公布結果。
咁啱上一批以中半山帝景園為主嘅招標單位，土地註冊處登記顯示，由MeritTeamLtd以超過八千萬買入四伙，其中十七樓單位，呎價唔使九千，比市價低六至七個巴仙。
蘭西
電郵地址：
