新車速報：<br>積架S-Type英國紳士換新裝

新車速報：
積架S-Type英國紳士換新裝

來自英國積架汽車嘅S-Type，自推出以來一直備受追捧，而新抵港嘅S-Type2.5V6SEFacelifted新型號就更見吸引；皆因佢除仍以一台輸出充裕嘅2.5V6偈作骨幹外，其賣相及車廂布局都有不同程度嘅改動，因而變得更有豪邁氣派。

記者：鄭達基　攝影：陳陶鈞

Facelifted造型成熟得多
雖然呢部Facelifted新版積架S-Type，車身線條與舊有型號相近，但內裏卻有多項改動，皆容易令人察覺；當中包括令車首造型望落更見一體化嘅頭泵把、新款鬼面罩、Xenon頭燈連清潔器、四輪新款17吋合金胎軨、經過重新設計並更具魅力嘅車尾造型等等，以上嘅變動不但令賣相變得成熟之餘，而且重要比舊有型號來得吸引㖭！另外值得一提嘅係，新車引擎蓋及尾冚更用上鋁合金模做，比傳統嘅來得更輕唔在講，堅固程度亦毫不遜色㗎！

■四周鑲有桃木裝飾嘅車廂鋪排，盡顯豪邁氣派。

闊落座艙氣派高
與舊有型號一樣，新車座艙同樣以寬敞闊落、乘坐舒適為賣點，廠方不但為其裝配前後兩排，承托力更高嘅高級真皮座椅，以及全新鑲有銀白框邊嘅四圓表板組合外，當然唔少得重有車門電窗、電動天窗、原廠左右獨立恒溫冷氣、高級CD音響、免提電話等配搭，加上鋪排得簡潔有序，用落方便容易。與此同時，駕駛者又可透過設於半皮半桃木軚環上嘅遙控鍵，去控制車上各項設備，從而令駕駛者毋須分神，只需輕觸遙控鍵去控制設備，令行車變得更安全。

2.5V6偈輸出足
雖然新車有多個地方作出改動，但一台2.5公升V6偈仍然係佢嘅主要動力來源，呢台偈不但輸出充裕（最大馬力為201匹），匹配埋一套轉檔順滑、來自ZF嘅6前速自動波箱，性能表現毋庸置疑；另外，廠方響強化新車底盤嘅同時，亦為其改換四輪17吋輪胎組合，加埋DSC及TractionControl等電子系統輔助，行車循迹性亦較前增強不少呢！

■新車以一台2.5公升V6偈作核心，表現予人十足信心。

■頭、尾冚皆用上鋁合金模做，較前來得更輕身。

■新款頭泵把配搭，望落係咪正得多？

■中控台有齊高級音響及恒溫冷氣外，右旁重有免提電話鍵盤。

■四輪新款17吋合金胎軨，可提高行車循迹性。

■新款尾燈編排，簡潔易讀之餘，下方重有原廠泊車感應器。

■一套來自ZF嘅6前速自動波，轉檔順滑流暢。

■後排設有冷氣送風口，有助提升乘坐舒適度。

■半皮半桃木軚環把持感高外，兩旁重有各設備嘅遙控鍵。

■兩排座椅皆以高級真皮鑲嵌，前排更備有電控調校。

■後排空間寬敞，重有中央手枕配備。

■表板右旁設有桃木修飾嘅同時，又有尾冚、油箱蓋及霧燈等設備嘅開關鍵。

■敞大電天窗組合，能令車廂變得開揚。

■新款兼鑲有銀白框邊嘅表板，資料豐富易讀。

重有幾款同級轎車
平治E240Avantgarde
較前變得富時尚感嘅造型，重有既齊全又豪華嘅車廂配備，另外再加上本身嘅品牌效應，所以一直不乏捧場客。
車價：$528,000

寶馬525iA
同樣擁有經過重新設計嘅造型及車廂，而且重散發出濃厚房跑車韻味；而佢所配用嘅一台2.5公升偈，又見慳油好力。
車價：$538,000

富豪S802.5T
剛抵港嘅新型號，喺擁有既獨特又富豪邁氣派嘅造型的同時，全車最吸引莫過於係一台輸出達210匹馬力嘅2.5公升Turbo偈。
車價：$409,000

積架S-Type2.5V6SEProfile
引擎：2497ccV6DOHC
馬力：201ps/6800rpm
扭力：25.5kgm/4000rpm
傳動：6前速自動波
懸掛：（前）雙搖臂（後）雙搖臂
制動：（前）透氣碟（後）透氣碟（ABS）
輪胎：235/50ZR17
尺碼：4905×1818×1447mm
軸距：2909mm；車重：1663kg
0-100公里：9.9秒；極速：225km/h
新車售價：$488,000
車輛提供：積架汽車（25200989）

■全新車尾設計，加有不少電鍍裝飾，望落倍見吸引。