動畫迷一定唔會忘記筋肉人動畫個句經典對白「牛肉麵、頂呱呱、味道確唔同，營養又唔差，我足足食咗三百年，食到興起，最好就落手揦！」，今年重係筋肉人誕生25周年，趁住呢個大日子，PS2專登請來自紅白機後，久未有喺遊戲界露面嘅筋肉人擺下擂台，讓Fans重溫其必殺技，《筋肉人》無論對動畫迷機迷都一樣可以過足癮。
記者：許福合
今次新一集《筋肉人》製作非常認真，專誠搵嚟《筋肉人》原作者Yudetamago，親自監督遊戲嘅製作同繪製圖像，所以保證遊戲內嘅筋肉人絕對唔會走樣，Fans必定可以放心。至於遊戲登場角色除咗大家熟悉嘅筋肉人外，更齊集動畫中嘅厲害角色，總共登場人物達48個，非常熱鬧，BANDAI更講到明會有隱藏人物出現，心水清嘅Fans相信都估到係邊幾個，絕對係Fans至愛！
《筋肉人》係以摔角為題材，若然你同小記一樣對摔角無乜認識都唔使擔心，呢個遊戲簡單講句就係將對手HP打至0或㩒住對手喺地上數3秒就係勝出，非常簡單。至於比賽方式就有4種，對戰模式最多可以讓4個玩家同時一起對戰，比賽模式可以揀自己喜愛角色比賽，隊際模式就係5人嘅輪流對戰，當中最過癮就數求生模式，有2種玩法，計算被擊倒前打倒敵人數量，或使用地獄使者打倒敵人並奪取敵人嘅面具，玩法比前幾種模式都特別。
至於呢個遊戲嘅精髓，都係着眼於多變化人物上，造型特別之餘，每名人物都各有獨特必殺技，變化多多，當配合指定條件，必殺技就會配合隱藏動畫出現，令Fans有如重溫動畫嘅激鬥場面，2個玩家喺同一隊時，更可以合組出必殺技，令破壞力大大提高。場景設計亦值得一讚，雖然比賽打來打去都只係喺擂台上，不過設計出色嘅場館亦令此Game生色不少，令玩家出場時就更加有氣勢！整體上此遊戲可有不俗嘅評價，較奇怪係即使用上超必，亦只係減對手些少血，角色變得非常「耐戰」，好鬼襟打，唔知係好事定壞事呢？
跟隨行貨《筋肉人》推出嘅，有呢款9名角色嘅首辦扭蛋，基本上只要到SCEHPartnerShop買《筋肉人》，就可獲得，不過《蘋果》讀者着數零舍多，大家只要拎住今日本版，到下列指定嘅SonyStyle，就可免費換領一套，名額只得50個，數量絕對有限，送完即止，筋肉人Fans千祈唔好錯過。
遊戲類型：格鬥
對應機種：PS2
遊玩人數：1至2人
行貨價格：$468
開發商：BANDAI
(C)RED/NIGHTOW2002,2004
換領點：
地點：SonyStyle
地址：銅鑼灣軒尼詩道555號東角中心16樓
查詢電話：28931183
