今年遊戲界淡市嚟得特別早，好多代理都開始用不存貨政策，存倉嘅舊貨亦開始鬥快清貨，之前大炒特炒嘅Game都唔例外，就好似PS2隻《FrontMission4》、《保保羅古斯》同《小飛俠阿童木》咁，都係$200有找，之前錯過咗嘅不妨留意。反而GC隻《Pikmin2》口碑不俗，加上貨源極少，漸漸炒上高價，家陣差不多要過$400先買到。
XBOX最大王牌優勢嘅XBOXLive，亞洲版終於前幾日正式登場，單係睇3大ISP供應商玩優惠鬥送機，再加上商場、舖頭、巴士RoadShow等大量宣傳，都算近年少見，而上網必要配件StarterKit首日去貨亦唔錯，連帶XBOX主機都好賣咗，至於上網方法各大Game書亦有詳細介紹，唔想買書亦可以上www.crossmedia.com討論區睇睇。
呢隻被譽為經典作《GUNSMOKE》續篇嘅《REDDEADREVOLVER》，今次以意識血腥暴力見稱嘅遊戲廠商ROCKSTAR，接咗Capcom手繼續開發，PS2、XBOX版先喺5月2日美國推出，有興趣不妨留意。日前歐洲推出咗嘅PS2《變形金剛》，遊戲內容同之前嘅日本版完全唔同，質素絕對高幾班，Fans今勻值得留意。
文：打機鐵人