恒指同國指噚日一齊反彈，恒指升7點，但總成交縮到只得87億元；國指升15點，成交亦大減一半至20億元。要沽嘅沽晒，想買嘅唔敢買，噚日下晝市況就有如老僧入定。
國企股係今次跌市嘅重災區，首當其衝的資源股，跌幅高達4至5成，無論基金同小投資者，都被打個措手不及。股民固然受創（賺頭蝕尾），基金亦不好過，佢哋雖然由高位開始一路都有掟貨，但相比持有嘅好倉，所沽嘅貨量，其實都只係佔一個好小嘅比例。因此，拋售潮一過，形勢轉穩，佢哋又會買番轉頭。呢一個浪，當係炒波幅，高沽低買，食多轉。
其實，中國雖然出招降溫，但未來兩三年，經濟仍會有7.5%至8.5%的高增長；而國企股的盈利，在宏觀調控之下，雖然未必能如早前預測的再大升，但有低雙位數的增長，相信唔成問題；即使最壞情況，盈利都應該能保持在去年的水平。因此，今次「跌過龍」嘅股份，日後反彈亦必然會好勁。
國指由02年10月11日的1746點起步，到04年1月5日的5441，升浪持續13個月，共上升3695點，調整升幅的0.382及0.5，國指可見4029及3593點，亦即係國指在此區域內，隨時會見底（暫時國指最低係上周五的3929點）。由於已出現背馳，唔排除國指走勢會同恒指一樣，先反彈後再試底。
不過，由於有宏觀調控的不明朗因素，國企未來表現會好波動，大上大落，因此，暫時可以上落市嚟玩，畢竟國企大幅回落到3000多點水平，平均PE只係7至8倍，相比5000多點時的13至15倍，已好吸引，具有投資價值，待國指升穿中期降軌（現約5000）及前高位5441後，才可確認新升浪再現。
鋼鐵業係宏調下首當其衝的行業，鋼鐵股在今個跌浪中，沽壓最重，跌幅亦最大，以重鋼（1053）為例，短短一個月內，由5.45元跌到最低的2.9元，跌幅46.8%，噚日仍見到大摩沽完又沽，不過，買方亦見有橫手盤密密收集，有對手，成交先有2100萬股，只要基金喺低位買到貨，第日就會造番上去。重鋼04年每股盈利估計0.99元，PE只係3倍！
郭兆誠