黃凱芹（Chris）月中會開兩場演唱會，佢呢排就忙於綵排同試衫，原來Chris請咗好多老友做嘉賓，同佢做個成粒鐘長嘅音樂劇。前晚佢就同倫永亮、李國祥一齊傾音樂劇嘅內容，聽講話佢兩個會飾演對愛情冇期望同心靈極度空虛嘅人。不過，就點都唔夠做嘉賓嘅蔡一傑咁夠噱頭，阿Chris前晚同馮仁昭講，話傑仔會扮美人魚㖭！
阿Chris又話：「其實佢個造型係源自一種北海道嘅神仙魚，我前排去完嗰度拍旅遊特輯時知道呢種魚係好特別嘅，佢好細條同埋會發光，後來度傑仔個角色時就靈機一觸，叫人以呢條魚為藍本去設計。因為傑仔個角色係一個用情專一嘅人，呢種人喺世間上都絕無僅有，就好似神仙魚咁樣。」
講到造型特別，阿Chris呢個主角梗係唔輸蝕啦，佢重試咗件重達一百磅嘅大褸畀馮仁昭睇。
阿Chris着住件嘢之後，重講笑話自己好似主持彌撒嘅神父喎，Chris話：「到時我着咗呢件衫就郁都唔郁得，分分鐘連隻手都拎唔起，我都未試過着一件有成百磅嘅衫上身。」嘩！到時唔知使唔使要人抬佢出場呢，如果係就真係辛苦晒班工作人員喇！
名模Rosemary噚日去咗深圳，為新世界集團旗下嘅豪宅宣傳。早前佢同媽咪好豪氣咁一筆過以八位數字買入兩個擎天半島單位，賺咗百幾萬之後，又計劃再買君臨天下，不過就因為入唔到相連單位而放棄。Rosemary𠵱家喺港島都搵緊超過一千呎嘅單位換樓，一個人住成千呎，唔通諗住同男友一齊住？點知佢話：「一個人住太大嘅屋梗係驚啦，我一定會養幾隻狗保護我。」
孔慶翔前日喺黃蜂主場迎戰熱火嘅NBA季後賽中場時間表演，孔慶翔重一如以往以古怪嘅舞步取悅觀眾。不過張敬軒噚日出席活動時就話：「佢（孔慶翔）自覺有實力，難聽啲講句佢係俾鬼佬嘲笑，我驚佢六月嚟香港宣傳嗰時會俾人噓，到時俾自己人嘲笑咪重慘。」
林子祥（阿Lam）噚日到港台接受訪問，對於許冠傑（阿Sam）復出個唱首日賣飛出現人龍，阿Lam就好戥阿Sam開心，但係佢就已經表明六月嗰時未必有時間欣賞阿Sam嘅個唱，或者要等到八月再加場時先可以睇喎。佢兩個惺惺相惜，阿Sam應該唔介意嘅。
無綫最近有好多唔同題材嘅劇集，又講玉石、又講時裝，不過，睇收視就反映到觀眾唔係好受落，好似由胡杏兒、李彩樺、陳敏之、謝君豪主演嘅《下一站彩虹》，首周播出就已經跌咗四點，平均有二十五點收視，喺上周五重跌到去十九點，喺無綫嚟講算係好差啦，真係陰功！
