噚日又到一年一度嘅報業公會香港最佳新聞獎頒獎典禮，八方首先恭喜所有得獎嘅行家。《蘋果》同事舊年咁努力，喺呢個派發報壇成績表嘅日子，自然唔少得我哋呢份。喺二○○三年度，《蘋果日報》一共奪得七個獎項，採訪部同事一手踢爆前度財爺喺加稅前買車，令佢黯然下台；沙士期間我哋為大家貼身報道第一手嘅疫情資料，分別得到「最佳新聞報道」季軍同優異獎。
《蘋果》中國專題組同事以感人肺腑嘅筆觸，深入專業嘅報道，以「廣西蔗農日入八毛錢吊命」，勇奪「最佳新聞寫作（中文組）」亞軍。講到新聞相片，攝影記者王子俊喺足球場上拍攝嘅「不要戰爭，祗要入球」同「從天而降」拎到「最佳體育圖片」亞軍同優異獎，司徒世華一幅「技驚四座」嘅跳繩相，同樣得到體育圖片優異獎。版面設計方面，有關美伊戰爭嘅「地面戰爆發及美軍濫殺」嘅報道，奪得最佳新聞版面設計亞軍。
今年係報業公會成立五十周年嘅大日子，頒獎禮喺會展舉行，由特首董建華主禮。不過，八方就覺得個獎座嘅設計成把刀咁，此時此刻，對於記者嚟講，真係百般滋味在心頭。
傳真︰2623-9278
電郵︰
