大班昨日封咪，香港電子言論自由，從此進入「日蝕期」，剩番三兩粒星星閃閃吓，加埋半邊月光，有少少光，不過遠遠唔夠！
大班臨別遺言，好似英雄殉國，發表告同胞書，並重點指出，身邊好多朋友，紛紛投敵叛變，搞到「訪舊半為鬼」，自己愈來愈感到窒息，呢一樣係佢封咪嘅原因，大班，我們香港人懷念你！
大班早嗰輪同毓民、陳耀南合做紅館新龍門陣，本來係講道傳福音，台下有個女觀眾反駁大班，點知大班即時嚴重失控，破口拍枱大罵觀眾，搞到氣氛好尷尬，後來大班道歉，自己再睇醫生，醫生話佢長期精神受壓，若果再做節目落去，一定會患上結構性抑鬱。
所以大班要被迫封咪，走咗去歐洲，保外就醫嘞。至於封咪之後喺電台不點名控訴嘅香港叛徒，經接班人兼港區人大李鵬飛踢爆，話係政務司司長煲呔曾，搞到呔哥即時發表聲明，話從未向大班施過壓！
樹欲靜而風不息，大班有老婆仔女，啱啱上湛江飲完西江水、俾祖國教育咗一輪嘅煲呔又何嘗冇？冇錯人哋仔大女大，重做埋醫生，不過成家喺晒香港，正所謂人在江湖，當年日軍侵入香港，殺上港督府，用把軍刀架住港督楊慕琦嗰條頸，楊慕琦咪一樣要下令英軍投降，束手就綁，進入集中營？今時今日，我哋曾爵士可以點做？唔通叫佢做文天祥？
當奴反應激烈，私底下呻話俾人屈。不過，少隻香爐少隻鬼，煲呔俾飛哥篤咗出嚟，老左嗰邊唔知幾多人鬼咁開心，因為唐唐都話過，做特首嘅條件之一，係為市民所認受，若然煲呔俾大班同飛哥搞臭，其他嘅特首寶座熱身人，係咪要齊齊飲杯呢？當奴若然再谷住道氣，小心分分鐘自己又會抑鬱埋，去立法會拍枱鬧人，跟住又要保外就醫，學大班咁遊歐洲咯。
講嚟講去，最有生命力嘅反為係董伯，佢俾人問候足七年，猛咁傳就快保外就醫，點知大班要就醫先過佢，真係物競天擇，路遙知牛力喎。大班，望你早日就醫完成，返港復咪，香港冇咗老董可以，冇咗大班嗰把Hong港自由之聲鵝公喉點得？
傳真︰2623-9278
電郵︰