英超聯的冠軍已由阿仙奴提早捧走，曼聯及車仔雖仍在打生打死爭亞軍，但已戲劇性欠奉，冇戲劇性嘅球賽跟冇張力嘅電影一樣咁乏味，無甚瞄頭。
反觀西甲這邊則如火如荼，超級無間道粒粒星的皇馬由於後備兵源不足，幾條A都已捱到落晒型，幾項大賽均已出局，惟有全副心機放在爭奪聯賽冠軍。
最近的一場皇馬對巴塞隆拿真是精采中的精采，場中的球星之多恍如濃縮版世界盃，就算唔當球賽睇，齋睇靚仔都值回捱眼瞓價，碧咸一身風流債之時，毅然自毀容貌，刮個光頭加上粗糙面部皮膚，登時由一個金髮鬼婆變回雄赳赳男兒，化悲憤為力量，場中走嚟走去，可惜底線出波時顯得有點腳軟，口痕友又話咁多女友，難怪腳軟。施丹性感地中海，溫文瀟灑，但睇得出經已攰得甩肺。朗拿度仍然肥仔嘜一名，他向來分得好清楚，踢聯賽只為養妻活兒，踢國家隊才會出真本領。費高努力想證明自己老馬有火，魯爾婚姻觸礁後經常一臉若有所失。這邊廂的朗拿甸奴雖然梳一個師奶頭兼哨起一棚牙，但真的是Fit得無可再Fit，女球迷仍為之歡呼傾慕。
二十二個球員雖然全部着制服，但髮型各有特色，裁剪自然，毋須落Gel，亂亂哋更顯魅力，相信是當地著名髮型師的手筆，真係唔鍾意睇足球都可以當係HairShow睇。