被譽為係德國平治汽車御用改裝公司之一嘅Brabus，喺最近為多款新車推出強化改裝版本，原來除咗新款SLK開篷跑車及Maybach豪華轎車外，另一邊廂亦有為平治旗下，同樣備受車迷追捧嘅CLK車系推出改裝版，而且重係好強勁㖭！
全車最惹人注目嘅地方，會係呢部BrabusCLKK8所採用嘅一台5.5公升引擎，經有關方面強化改裝，同埋改換上高性能跑車排氣系統後，馬力輸出急升至550ps/6400rpm，而扭力輸出亦激增至79.5kgm/3000rpm，匹配一套5前速自動波箱，起步加速反應爽快直接，0至100公里加速僅為4.1秒，而極速更可達325km/h咁快。與此同時，呢部改裝版辣車又換埋Brabus跑車懸掛系統，以及高效能制動系統，務求有更佳行車循迹表現外，亦能予人收放自如嘅效果。
至於外形方面，此車不但裝有全車包圍外，最有型莫過於一套四輪19吋大型跑車合金胎軨，有如此配襯，難怪會令車子賣相變得更富跑味，車廂內亦有唔少跑車化裝飾，當中包括一雙承托力甚高嘅真皮跑車桶椅等等，務求讓你有置身高性能跑車嘅感覺。
記者：鄭達基