前日AC米蘭對羅馬嘅意甲榜首戰可以話係球場保安嘅反面教材，睇見下半場AC球門後面不斷有球迷掟煙花、硬物入場，而迪達同埋加度素就先後中招，慘過受難。場面控制得咁曳，假如作為座上客嘅總理貝盧斯科尼真係為意大利足球着想，係時候做番啲嘢嘞，如果唔係意大利波遲早被玩榭。
姑勿論迪達中招有無扮嘢成分，但睇見佢置身戰場多過球場。我求大俠覺得意國政府以後真係要嚴格執行，唔好再俾球迷帶攻擊性物品進場。撇開安全同埋形象問題，呢場波就因為球迷猛咁掟嘢，停頓完一次又一次，搞到超晒時至完場；相信當地電視台都因為咁而亂晒節目部署，完場後想播多啲慶祝場面都唔得，講到尾咪又係觀眾損失。
「狂人之子」薩迪卡達菲前日以後備身份代表佩魯賈出戰祖雲達斯，作意甲處子演出。薩迪卡達菲係前祖雲達斯董事，而祖記係意甲班霸，以呢場波作處子演出當然威水，所以佢早就揚晒要踢呢場波。佩魯賈喺護級關鍵時刻重用呢件新人，你話無商業考慮就勢係假，好彩最後贏波，衰就真係唔抵幫。
奧拉利日前就帶領維拉贏熱刺慶祝四十六歲生日，重有機會爭下屆歐冠盃參賽資格，但係列斯同日就輸畀保頓要降班，對曾任列斯領隊嘅奧拉利來講，兩年前突然俾球會炒魷，今次唔使做降班罪人。不過，佢話唔明列斯有呢批人腳點解要搞到降班，乘機踩多一腳，我求大俠覺得有欠風度喎！
英格蘭國家隊教練之一嘅傑特，因為攝護腺癌要做手術；艾歷臣經已搵定米堡領隊麥卡倫，隨時頂上，最大問題係麥卡倫同電視台簽咗一份四萬鎊合約，喺歐洲國家盃期間做評述員。我求大俠覺得，麥卡倫梗係幫國家隊，如果英格蘭殺入決賽，就算獎金無咁多，難能可貴嘅榮譽唔係用錢可以買到。