近年動作多多嘅德國寶馬汽車，先後推出多款新車如新一代5系房車及6系跑車，以至係最近期嘅1系等等，全都惹人注目；不過若你覺得1系唔係咁啱你口味的話，就不妨等等今日為你介紹嘅呢款全新2系喇！
消息指有望於2007年推出嘅全新寶馬2系，造型可謂甚具跑味；皆因從預想圖中可以睇到，廠方特別為新車研製出一個極為流線型嘅雙門車體，喺略帶現行M3跑車影子嘅車首設計，以及與Z4開篷跑車甚為相近嘅線條襯托下，就最能將佢富年輕活力感嘅一面，徹底地展示出來。至於車廂布局方面，由於新車仍在設計階段，故有待廠方公布有關資料後方可作實。
據有關消息指出，廠方又會為選擇2系嘅用家，提供多個不同引擎嘅型號供選擇，當中包括入門版216i所採用嘅一台1.6公升偈（馬力115匹）、220i嗰台能輸出150匹馬力嘅2.0公升引擎，同埋225i所用嘅嗰台2.4公升（馬力220匹）型號，絕能迎合唔同用家嘅口味㗎！
記者：鄭達基