潮界金牌經紀大隻標自稱一代潮神，唔係Crossover唔着、唔係特別版唔買，買衫要落銅鑼灣、食飯要上中環半山，但嚟緊呢年佢話將會經常去旺角，原來旺角新地標「朗豪坊」將有大搞作。大隻標隨手介紹佢手上嘅「朗豪坊」專書，封面有隻哥斯拉咁大嘅紅色高踭鞋踩落旺角，口痕友話感覺非常Fetish，鬼馬兼曖昧！不過出嚟效果搶眼，令人印象深刻。江湖傳聞「朗豪坊」幕後搞手曾參與日本六本木山重建計劃，呢次誓將旺角舊區砵蘭街、新填地街嗰頭拉高幾班。西武百貨已帶頭喺「朗豪坊」租咗兩層（喺1樓同2樓），而無印良品亦租咗全層（聽講喺6樓），實行開全港最大無印旗艦店；淨係無印呢單嘢已夠號召力，難怪好多潮人話今後唔介意落旺角。不過唔知點解好多公司引述「朗豪坊」地址時只講位於亞皆老街，好少人敢講其實亦位於砵蘭街，可能怕印象唔好。其實計我話砵蘭街個名都冇乜嘢啫，英文名稱PortlandStreet，人哋美國Nike總部都係設於美國Portland，所以下次介紹「朗豪坊」時話位於Portland就既大方亦得體喇。
主持人：大食Jack
八卦熱報：